«Ավրորայի արշալույսը» ֆիլմի ցուցադրությունն Ամստերդամում

19 ապրիլի, 2023

Ապրիլի 19-ին, Հաագայում Հայաստանի դեսպանության, Նիդերլանդների հայկական կազմակերպությունների ֆեդերացիայի և «Periscoop films» ընկերության կազմակերպմամբ Ամստերդամի «Eye» կինոթատրոնում տեղի ունեցավ «Ավրորայի արշալույսը» ֆիլմի ցուցադրությունը՝ նվիրված Հայոց ցեղասպանության 108-րդ տարելիցին։

Ցուցադրությանը ներկա էին Նիդերլանդների ԱԳՆ-ի բարձրաստիճան պաշտոնյաներ, դեսպաններ, Հաագայում հատարմագրված միջազգային և եվրոպական կառույցների ղեկավարներ, Նիդերլանդների Խորհրդարանի ներկա և նախկին անդամներ, հասարակական և քաղաքական գործիչներ, հայ համայնքի ներկայացուցիչներ:

Ֆիլմի մեկնարկին ելույթներով հանդես եկան Նիդերլանդներում ՀՀ դեսպան Տիգրան Բալայանը և կոալիցիոն «Քրիստոենական միություն» կուսակցության արտաքին քաղաքական հարցերով խոսնակ, պատգամավոր Դոն Սեդերը։

Դեսպան Բալայանն իր ելույթում զուգահեռներ անցկացրեց Օսմանյան կայսրությունում տեղի ունեցած հայերի ցեղասպանության և արցախահայության դեմ Ադրբեջանի կողմից իրականացվող ապօրինությունների միջև՝ ընդգծելով, որ նույն խոստումները, որոնք տրվում էին տարիներ շարունակ Օսմանյան կառավարությունների կողմից հայերին, այսօր տրվում են Ադրբեջանի կառավարության կողմից արցախահայությանը, իսկ Օսմանյան սուլթանների և Ադրբեջանի ներկայիս ղեկավարի բացարձակ իշխանության միջև ևս տարբերություններ չկան։

Կարևորելով նման ոճրագործությունների ճանաչումն ու դատապարտումը՝ որպես դրանց կանխարգելման միջոց՝ դեսպանը Հայաստանի և հայ ժողովրդի անունից շնորհակալություն հայտնեց Նիդերլանդների Խորհրդարանին՝ Հայոց ցեղասպանության ճանաչման համար: Դեսպանը հույս հայտնեց, որ վերջապես Նիդերլանդների կառավարությունը ևս կճանաչի Հայոց ցեղասպանությունը՝ անսալով Խորհրդարանի բազում բանաձևերին և երկրի հասարակական կարծիքին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր